(ហាណូយ) ៖លោក វ្ល៉ាឌីមៀ ពូទីន ប្រធានាធិបតីរុស្ស៊ី បានអញ្ជើញដល់ប្រទេសវៀតណាមហើយនៅព្រឹកថ្ងៃព្រហស្បតិ៍ ២០ មិថុនានេះ ដើម្បីជួបពិភាក្សាជាមួយមេ ដឹកនាំរបស់ប្រទេសនេះ បន្ទាប់ពីបានបញ្ចប់សន្ធិសញ្ញាការពារជាតិជាមួយកូរ៉េខាងជើងសម្រាប់ការឈប់សំចតចុងក្រោយរបស់លោកក្នុងដំណើរទស្សនកិច្ចមកកាន់ប្រទេសចំនួនពីរនៅតំបន់អាស៊ី។
ទស្សនកិច្ចរបស់លោក ពូទីន នៅវៀតណាម ពេលនេះ បង្ហាញពីឥទ្ធិពលរបស់រុស្ស៊ី នៅអាស៊ីអាគ្នេយ៍ខណៈ
ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) កំពុងស្ថិតនៅក្នុងប្រទេសវៀតណាម នៅថ្ងៃព្រហស្បតិ៍ (២០ មិថុនា) នេះ ជាលើកដំបូងក្នុង រយៈ ពេលជាង១ទសវត្សរ៍ទីដែលលោកត្រូវបានគេរំពឹងថា នឹងស្វះស្វែងរកការគាំទ្រ ខណៈទីក្រុងមូស្គូ ប្រឈមនឹងភាពឯកោអន្តរជាតិជុំវិញសង្រ្គាមអ៊ុយក្រែន។ ដំណើរទស្សនកិច្ចផ្លូវរដ្ឋរយៈពេលពីរថ្ងៃរបស់លោកពូទីន នឹងបង្ហាញការយកចិត្តទុកដាក់លើឥទ្ធិពលរបស់រុស្ស៊ី នៅ ក្នុងតំបន់អាស៊ីអាគ្នេយ៍ ដែលទីក្រុងហាណូយ នៅតែជាមិត្តមួយក្នុងចំណោមមិត្តមួយចំនួនរបស់ទីក្រុងមូស្គូ។
លោកប្រធានាធិបតីត្រូវបានគេរំពឹងថានឹងជំរុញឱ្យមានទំនាក់ទំនងកាន់តែជិតស្និទ្ធជាមួយវៀតណាម តាមរយៈកិច្ចសហប្រតិបត្តិការលើវិស័យការពារជាតិ ថាមពល ពាណិជ្ជកម្ម និងប្រតិបត្តិការរូបិយប័ណ្ណ កសាងទំនាក់ ទំនងទ្វេភាគីយូរអង្វែង។
ដំណើរទស្សនកិច្ចនេះក៏កើតមានឡើងបន្ទាប់ពីលោក ពូទីន បានទៅទីក្រុងព្យុងយ៉ាងកាលពីថ្ងៃពុធ មុននោះ សម្រាប់ដំណើរទស្សនកិច្ចលើកដំបូងរបស់ខ្លួនទៅកូរ៉េ ខាងជើងក្នុងរយៈពេល ២៤ឆ្នាំកន្លងមក។
វៀតណាម បានបន្តទំនាក់ទំនងស៊ីជម្រៅជាប្រវត្តិសាស្ត្រជាមួយអតីតសហភាពសូវៀត ទោះបីជាប្រទេសនេះចងសម្ព័ន្ធភាពជាមួយសហរដ្ឋអាមេរិក ក្នុងការប្រឆាំងនឹងចិន ក៏ដោយ។ ជំនួយពីរុស្ស៊ីបានដើរតួនាទីយ៉ាងសំខាន់ក្នុងប្រវត្តិសាស្ត្រសង្រ្គាម និងការកសាងប្រទេសរបស់វៀតណាម នៅពេលសន្តិភាពបានចាប់ផ្ដើមឡើងវិញ ៕
