ខេត្តព្រះសីហនុ÷ករណីគ្រោះថ្នាក់ចរាចរណ៍មួយបានកើតឡើងនៅលើកកំណត់ផ្លូវជាតិលេខ៤ ក្នុងក្រុងព្រះសីហនុបណ្ដាលឲ្យបុរស២នាក់ ស្លាប់នៅនឹងកន្លែងកើតហេតុនៅវេលារំលងអាធ្រាត។ សមត្ថកិច្ចមានការកត់សម្គាល់ថា មួយរយៈចុង ក្រោយនេះករណីគ្រោះ ថ្នាក់ចរាចរណ៍នៅក្រុងព្រះសីហនុមានការកើនឡើងគួរឲ្យព្រួយបារម្ភ។
មន្ត្រីនគរបាលក្រុងព្រះសីហនុបានឱ្យដឹងថា នៅវេលាម៉ោងជាង ១ រំលងអាធ្រាតឈានចូលថ្ងៃទី៨ ខែមីនា ឆ្នាំ២០២៥ លើផ្លូវជាតិលេខ៤ ត្រង់ចំណុចមុខរោងចក្រញ៉ូវស្តា ស្ថិតក្នុងភូមិ១ សង្កាត់លេខ១ ក្រុងព្រះសីហនុ ខេត្តព្រះសីហនុ ករណីគ្រោះថ្នាក់ចរាចរណ៍១កើតឡើង រវាងម៉ូតូ០១គ្រឿងម៉ាក HONDA DREAM C125 ពណ៌ខ្មៅ អ្នកបើកបរឈ្មោះ ដា ភេទប្រុស អាយុ ២៣ឆ្នាំ ជនជាតិខ្មែរ មុខរបរជាងដែក បច្ចុប្បន្នស្នាក់នៅភូមិ១ សង្កាត់លេខ១ ក្រុងព្រះសីហនុ ខេត្តព្រះសីហនុ ដែលមានទិសដៅពីលិចឆ្ពោះទៅកេីត(សង្ស័យបញ្ច្រាស់ទិស) លុះមកដល់ចំណុចកេីតហេតុខាងលើ បេីកក្នុងល្បឿនលឿនបុកជាមួយនឹងម៉ូតូ០១គ្រឿងម៉ាក HONDA SCOOPY ពណ៌ខ្មៅ បេីកបរដោយឈ្មោះ សំ ថៃប៊ុនរ៉ុង ភេទប្រុស កេីតឆ្នាំ២០០០ ជនជាតិខ្មែរ មានទីលំនៅភូមិជ្រលង ឃុំខ្នាត ស្រុកពួក ខេត្តសៀមរាប ដែលមានទិស ដៅផ្ទុយគ្នា(បេីកស្របទិសរបស់ខ្លួន)។
ករណីគ្រោះថ្នាក់ចរាចរណ៍ខាងលើនេះ បានបណ្តាលឲ្យស្លាប់មនុស្ស ២នាក់ដែលជាអ្នកបេីកបរម៉ូតូ HONDA DREAMនិងអ្នកបេីកបរម៉ូតូ HONDA SCOOPY។
សាកសពបានប្រគល់ជូនក្រុមគ្រួសារយកទៅធ្វេីបុណ្យតាមប្រពៃណី។
ចំណែកឯវត្ថុតាង ម៉ូតូ០២គ្រឿងដែលខូចយ៉ាងខ្លាំងត្រូវបានសមត្ថកិច្ចយកមករក្សាទុកបណ្តោះអាសន្ននៅការិយាល័យនគរបាលចរាចរណ៍ផ្លូវគោក ដេីម្បីបន្តតាមនីតិវិធី។
សមត្ថកិច្ចនគរបាលខេត្តព្រះសីហនុបានអំពាវនាវឲ្យប្រជាពលរដ្ឋបើកបរដោយការប្រុងប្រយ័ត្នខ្ពស់ ពីព្រោះមានការកត់សម្គាល់ថា គ្រាន់តែក្នុងរយៈពេល១ខែកុម្ភៈកន្លងទៅ ករណីគ្រោះថ្នាក់ចរាចរណ៍បានបណ្ដាលឲ្យមនុស្សជាង១០នាក់ស្លាប់និងរងរបួសរាប់សិបនាក់ទៀតនៅខេត្តព្រះសីហនុ៕
