(ភ្នំពេញ)៖ លោក គង់ ចាន់ធីណា អគ្គលេខាធិការ សហព័ន្ធខ្មែរកីឡាហាប់គីដូបានលើកឡើងថា ការជួយឧបត្ថម្ភគាំទ្រពីវិស័យឯកជន ក្នុងការរៀបចំការប្រកួតកីឡាហាប់គីដូ ជ្រើសរើសជើងឯកថ្នាក់ជាតិ ឆ្នាំ២០២៤ គឺជាការជួយសម្រួលបន្ទុកមួយដ៏ធ្ងន់របស់សហព័ន្ធ ។ លោកអគ្គលេខាធិការបានលើកឡើងបែបនេះក្នុងឱកាសនាំយកលិខិតថ្លែងអំណរគុណទៅប្រគល់ជូនក្រុមហ៊ុន ISI កាលពីល្ងាចថ្ងៃទី៣០ ខែធ្នូ ឆ្នាំ២០២៤ដល់តំណាងដោយលោក ឡាំ គុយ អ្នកសម្របសម្រួលគម្រោង អង្គការមូលនិធិ ខេ អឹម អេច នៃក្រុមហ៊ុន ISI។
លោក គង់ ចាន់ធីណា គូសបញ្ជាក់ថា លោក គួច ហុងជៀក ប្រធានស្តីទីសហព័ន្ធខ្មែរកីឡាហាប់គីដូបានអនុញ្ញាតឱ្យក្រុមការងារសហព័ន្ធយកលិខិតថ្លែងអំណរគុណជូនដល់ក្រុមហ៊ុនដែលបានជួយឧបត្ថម្ភគាំទ្រដល់កម្មវិធីប្រកួតកីឡាហាប់គីដូ ជ្រើសរើសជើងឯកថ្នាក់ជាតិ ឆ្នាំ២០២៤ ដែលបានរៀបចំឡើងប្រកបដោយភាពជោគជ័យ កាលពីថ្ងៃទី២១-២២ ខែធ្នូ កន្លងទៅថ្មីៗនេះ។
នៅក្នុងឱកាសសំណេះសំណាល និងប្រគល់លិខិតថ្លែងអំណរគុណនេះ លោក ឡាំ គុយ អ្នកសម្របសម្រួលគម្រោង អង្គការមូលនិធិ ខេ អឹម អេច បានបង្ហាញក្តីសប្បាយរីករាយ ដែលបានចូលរួមឧបត្ថម្ភគាំទ្រដល់ការប្រកួតជើងឯកថ្នាក់ជាតិ លើកទី២ ឆ្នាំ២០២៤ ដើម្បីលើកស្ទួយវិស័យកីឡាហាប់គីដូនៅកម្ពុជាឱ្យមានដំណើរការអភិវឌ្ឍបន្តទៀត។
គួររម្លឹកថា ការប្រកួតកីឡាហាប់គីដូ ជ្រើសរើសជើងឯកថ្នាក់ជាតិ លើកទី២ កាលពីថ្ងៃទី២១-២២ ខែធ្នូ ឆ្នាំ២០២៤ មានក្លឹបចូលរួមចំនួន៥ ដោយមានប្រតិភូ គ្រូបង្វឹក កីឡាករ កីឡាការិនីសរុបចំនួន ៨៧នាក់ ក្នុងនោះកីឡាករ កីឡាការិនី ៦៧នាក់ (ស្រី ២៧នាក់)ប្រកួតលើ ២៥វិញ្ញាសា។ ចំពោះលទ្ធផលជ័យលាភី រួមមាន៖ ចំណាត់ថ្នាក់លេខ១ ក្លឹបក្រសួងមហាផ្ទៃ មេដាយសរុប ២៦គ្រឿង ក្នុងនោះមេដាយមាស ១២ ប្រាក់៧ និងសំរឹទ្ធ៧, ចំណាត់ថ្នាក់លេខ២ ក្លឹបធីណា មេដាយសរុប ២២គ្រឿង មានមាស ៥ ប្រាក់៩ និងសំរឹទ្ធ៨, លេខ៣ ក្លឹបអូឡាំពិក មេដាយសរុប១៨ មានមាស៤ ប្រាក់៣ និងសំរឹទ្ធ១១, លេខ៤ ក្លឹបម៉ាស្ទ័រសេង មេដាយសរុប១៦គ្រឿង មានមាស ៣ ប្រាក់២ និងសំរឹទ្ធ១១ ខណៈលេខ៥ ក្លឹបឥន្ទ្រីយ៍ មេដាយសរុប១០ មានមាស១ ប្រាក់៤ និងសំរឹទ្ធ៥គ្រឿង ៕ 
