ខេត្តកណ្តាល ÷ ករណីដាក់យ៉បិទព្រែកនៅភូមិតាព្រហ្ម ឃុំលើកដែក ស្រុកកោះធំ ខេត្តកណ្តាល ត្រូវឈ្មួញថៅកែបទល្មើសឈ្មោះហ៊ុយប្រាប់ថាបានសុំច្បាប់ត្រឹមត្រូវពីអាជ្ញាធរមានសមត្ថកិច្ចហើយ។ ដូច្នេះគេអាចដាក់បទល្មើសនេសាទដើម្បីប្រមូលផលនេសាទបានដោយសេរី។ មជ្ឃដ្ឋានប្រជាពលរដ្ឋនៅស្រុកកោះធំបានលើកជាសំណួរថា តើអាជ្ញាធរមានសមត្ថកិច្ចមួយណាដែលអនុញ្ញាតច្បាប់ឲ្យឈ្មួញដាក់យ៉ បិទព្រែកនៅភូមិតាព្រហ្មនោះ?
ប្រជាពលរដ្ឋបានឲ្យដឹងថា ទីតាំងដាក់យ៉បិទព្រែកមួយកន្លែង ស្ថិតនៅភូមិតាព្រហ្ម ឃុំលើកដែក ស្រុកកោះធំ កំពុងដំណើរការនៅរដូវត្រីត្រូវនេះ ខណៈលោក ហ៊ុយ បាននិងកំពុងគៀងគរកេណ្ឌបក្ខពួក ឱ្យប្រមូលផលត្រីយកទៅលក់នៅប្រទេសវៀតណាម យ៉ាងអនាធិបតេយ្យ ដោយពុំមានការរំខានដល់អាជ្ញាធរ មន្ត្រីជំនាញពាក់ព័ន្ធ ក្នុងមូលដ្ឋានឡើយ។ ពួកគេកំពុងប្រព្រឹត្តល្មើសជាចំហដោយមិនខ្លាចអាជ្ញាធរដែនដីស្រុកកោះធំ ជាពិសេសមិនខ្លាចមន្ត្រីជំនាញរដ្ឋបាលជលផលខេត្តកណ្ដាលនោះឡើយ។ ប្រជាពលរដ្ឋឆ្ងល់ថា តើសមត្ថកិច្ចខាងណាអនុញ្ញាតច្បាប់ឲ្យឈ្មួញប្រព្រឹត្តល្មើសយ៉ាងដូច្នេះ?
ប្រភពដដែលបន្តថា នៅចំណុចទីតាំងខាងលើនេះ គេសង្កេតឃើញថា ក្នុង១ថ្ងៃៗមានម៉ូយត្រីរាប់សិបតោនដែលជាជនជាតិវៀតណាម បានចូលមកចាំទទួលយកត្រី ដែលលោក ហ៊ុយ និងបក្សពួក បានដួសពីក្នុងយ៉ ដើម្បីយកទៅលក់នៅក្នុងប្រទេសខ្លួន បានយ៉ាងរំភើយ ដោយមិនដឹងថា ការដាក់យ៉បិទព្រែកខាងលើបានការច្បាប់អនុញ្ញាតពីស្ថាប័នពាក់ព័ន្ធណានោះទេ ។
យោងតាមការលើកឡើងរបស់លោក ហ៊ុយ កាលពីព្រឹកថ្ងៃទី១៣ ខែធ្នូ ឆ្នាំ២០២៤នេះ និយាយថា ចំពោះទីតាំងដាក់យ៉បិទព្រែករបស់លោកខាងលើនេះគឺមាន ច្បាប់ដូចគេដូចឯង។ ប៉ុន្តែលោក ហ៊ុយ មិនបានឲ្យច្បាប់នោះដល់ក្រុមការងារមើលនោះទេ។
បើតាមប្រជាពលរដ្ឋក្នុងមូលដ្ឋានខាងលើសង្ស័យថាវាគ្រាន់តែជាការឃុបឃិតគ្នារវាងពួកសមត្ថកិច្ចជំនាញនៅថ្នាក់មូលដ្ឋានជាមួយនឹងអាជ្ញាធរពាក់ព័ន្ធតែប៉ុណ្ណោះ។ក្នុងករណីនេះ លោក ទេព វេទី សង្កាត់ជលផលស្រុកកោះធំ ក្រុមការងារមិនអាចទាក់ទង សុំការបកស្រាយបំភ្លឺបានទេដោយសារពុំមានលេខទូរស័ព្ទ។ រីឯលោក ហេង សុភារិទ្ធ នាយខណ្ឌជលផលខេត្តកណ្តាល លោកថា ដូចជាមិនបានដឹងនោះទេចំពោះករណីនេះ។
ប្រជាពលរដ្ឋនៅឃុំលើកដែក សំណូមពរដល់លោក ឆែ វណ្ណឌី អភិបាលស្រុកកោះធំ ក៏ដូចជា លោកគួច ចរើនអភិបាលខេត្តកណ្ដាល មេត្តាចាត់កម្លាំងក្រោមឱវាទចុះត្រួតពិនិត្យមើលទីតាំងដាក់យ៉ បិទព្រែករបស់លោក ហ៊ុយ នេះផង។ ជាពិសេសត្រូវស្រាវជ្រាវរកមើលឲ្យបានច្បាស់លាស់ថា តើពិតជាមានអាជ្ញាធរមានសមត្ថកិច្ចលក់ព្រែកខាងលើឲ្យឱ្យឈ្មួញដាក់បទល្មើសនេសាទមែនឬយ៉ាងណា? ប្រជាពលរដ្ឋនៅតំបន់ខាងលើនេះហាក់ដូចជាមិនសប្បាយចិត្តចំពោះទង្វើនេះទេ៕ 
