ខេត្តកំពង់ចាម÷កម្លាំងកងរាជអាវុធហត្ថខេត្តកំពង់ចាម នៅថ្ងៃទី ២៣ ខែមករាឆ្នាំ ២០២៥ បានបង្ក្រាបក្មេងទំនើងដែលជិះម៉ូតូប្រើស៊ឺម៉ាំងកែច្នៃ បំពងសំឡេងរំខានប្រជាពលរដ្ឋ ចំណុចភូមិទី៨ សង្កាត់កំពង់ចាម ក្រុងកំពង់ចាម ។
មន្ត្រីកងរាជអាវុធហត្ថបានឲ្យដឹងថា នៅវេលាម៉ោង២២ និង ៣០នាទី ថ្ងៃទី២៣ ខែមករា ឆ្នាំ២០២៥ កម្លាំងកងរាជ អាវុធហត្ថខេត្តកំពង់ចាម សហការជាមួយកម្លាំង មូលដ្ឋានកងរាជអាវុធហត្ថក្រុងកំពង់ចាម បានចុះល្បាតក្នុងភូមិសាស្ត្រក្រុងកំពង់ចាមទៅដល់ ខេត្តកំពង់ចាមបានឃើញក្មេងទំនើងពីរនាក់កំពុងប្រព្រឹត្តសកម្មភាពជិះម៉ូតូ០១គ្រឿង ម៉ាកC-១២៥ ពណ៌ខ្មៅ ផលិតឆ្នាំ ២០១៨ ស្លាកលេខ ភ្នំពេញ 1GT-6125 ប្រើប្រាស់បំពង់សុីម៉ាំង កែច្នៃខុសបច្ចេកទេស បំពងសំឡេងរ៉ូលាន់រំពង បង្កការរំខានដល់ប្រជាពល រដ្ឋនៅក្នុងភូមិ ភ្លាមនោះកម្លាំងមាន សមត្ថកិច្ចបានហៅឱ្យឈប់ដើម្បីធ្វើការសួរនាំ។
ជាលទ្ធផល បានហៅមនុស្សពីរនាក់ ១.ឈ្មោះ ភ័ណ្ឌ បញ្ញា ភេទប្រុស អាយុ២៩ឆ្នាំ មុខរបរបើកបររស់នៅភូមិកំពង់វាំង ឃុំប្រឡាយ ស្រុកស្ទោង ខេត្តកំពង់ធំ និង ២.ឈ្មោះ អេង សុគន់ ភេទប្រុស អាយុ ២៨ឆ្នាំ មុខរបរបើកបរ រស់នៅភូមិទន្លេបិទលើ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ ។
មន្ត្រីកងរាជអាវុធហត្ថបានបញ្ជាក់ថា បច្ចុប្បន្ន ជនទាំងពីរខាងលើបានធ្វើការអប់រំនិង ឱ្យអាណាព្យាបាលមកធានាវិលទៅលំនៅឋានវិញ ចំណែកវត្ថុតាងម៉ូតូមួយគ្រឿងរក្សាទុកនៅបញ្ជាការដ្ឋានកងរាជអាវុធហត្ថខេត្តរយះពេលបីខែ ៕
