(ខេត្តតាកែវ) ៖សមត្ថកិច្ចបានបង្ក្រាបមុខសញ្ញាដឹកជញ្ជូនជួញដូរ និងប្រើប្រាស់សារធាតុញៀនខុសច្បាប់ដែលប្រភពមិនបញ្ចេញឈ្មោះឲ្យដឹងថាឈ្មោះ ឆឹង វុទ្ធី ហៅតា ធី ជាមេធំចែកចាយបន្តពីមេឃគ្រឿងញៀន។
មន្ត្រីនគរបាលស្រុកត្រាំកក់បានឲ្យដឹងថា កាលពីថ្ងៃ អង្គារ ៣រោច ខែអាសាឍ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី២៣ ខែកក្កដា ឆ្នាំ២០២៤ វេលាម៉ោង ១៧ និង ៣០ នាទី តាមបទបញ្ជារលោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវ និងមានការសម្របសម្រួលពីលោក លីម ហ៊ន ព្រះរាជអាជ្ញារងអមសាលាដំបូងខេត្តតាកែវ កម្លាំងជំនាញ នៃអធិការដ្ឋាននគរបាលស្រុកត្រាំកក់ សហការជាមួយកម្លាំងប៉ុស្តិ៍នគរបាលរដ្ឋបាលគុស ដឹកនាំដោយលោកវរសេនីយ៍ឯក ឌុក ធីយ៉ា អធិការនគរបាលស្រុកត្រាំកក់ បានចុះបង្ក្រាបករណីដឹកជញ្ជូនជួញដូរ និងប្រើប្រាស់សារធាតុញៀនខុសច្បាប់ ០១ករណី ចំនួន ០២ទីតាំង៖
– ទីតាំងទី០១ នៅចំនុចផ្លូវលំដីស ស្ថិតក្នុងភូមិអកពង ឃុំគុស ស្រុកត្រាំកក់ ខេត្តតាកែវ ឃាត់ខ្លួនជនសង្ស័យបានចំនួន ០១ នាក់ ឈ្មោះ ញ៉ែម ភិន ភេទស្រី អាយុ ៧៣ ឆ្នាំ មានទីលំនៅភូមិទំនប់ជ្រៃ ឃុំគុស ស្រុកត្រាំកក់ ខេត្តតាកែវ (ដឹកជញ្ជូន)ដកហូតវត្ថុតាងនៅនឹងខ្លួនជន សង្ស័យបានរួមមានម្សៅក្រាមពណ៌សថ្លា សង្ស័យជាសារធាតុញៀនចំនួន ០១កញ្ចប់តូចនិងម៉ូតូ០១គ្រឿង។
– ទីតាំងទី០២ នៅចំនុចភូមិទំនប់ជ្រៃ ឃុំគុស ស្រុកត្រាំកក់ ខេត្តតាកែវ ឃាត់ខ្លួនជនសង្ស័យបានចំនួន ០៤នាក់ ដូចខាងក្រោម ៖
១.ឈ្មោះ ឆែម ចំរើន ហៅ ២១ ភេទប្រុស អាយុ ៣៨ ឆ្នាំ មានទីលំនៅភូមិទំនប់ជ្រៃ ឃុំគុស ស្រុកត្រាំកក់ (ជួញដូរ និងប្រើប្រាស់)។
២.ឈ្មោះ ឆឹង វុទ្ធី ភេទប្រុស អាយុ ៥៥ ឆ្នាំ មានទីលំនៅភូមិតាគាំ ឃុំតាភេម ស្រុកត្រាំកក់ (ប្រើប្រាស់)។
៣.ឈ្មោះ ម៉ី រ៉ា ភេទប្រុស អាយុ ៤០ ឆ្នាំ មានទីលំនៅភូមិព្រៃស្រោង ឃុំអង្គតាសោម ស្រុកត្រាំកក់ (ប្រើប្រាស់)។
៤.ឈ្មោះ នៅ ពុទ្ធា ភេទប្រុស អាយុ ២៦ ឆ្នាំ មានទីលំនៅភូមិព្រៃឈើទាលលើ ឃុំអង្គតាសោម ស្រុកត្រាំកក់ (ប្រើប្រាស់)។
ប្រភពមិនបញ្ចេញឈ្មោះបានឲ្យដឹងថាឈ្មោះ ឆឹង វុទ្ធី ហៅ តាធី ជាមុខសញ្ញាចែកចាយគ្រឿងញៀនដែលសមត្ថកិច្ច បានធ្លាប់ឃាត់និងចាប់បាននាពេលកន្លងមកតែហាក់មានរនាំងបាំងដោយឥទ្ធិពលលុយឬយ៉ាង ណា? ប្រភពមួយទៀតបានឲ្យដឹងថា បុគ្គលខាងលើនេះមាន ការតាមប្រមាញ់ ពីសំណាក់សមត្ថកិច្ចខេត្ត កំពត ? សង្ឃឹមថាបុគ្គលខាងលើនិងត្រូវបានអនុវត្តច្បាប់អោអោយបានតឹងរិងបំផុត។
នៅក្នុងរង្វង់ប្រតិបត្តិការសមត្ថកិច្ច ដកហូតវត្ថុតាងនៅក្នុងរោងឈើជនសង្ស័យឈ្មោះ ឆែម ចំរើន ហៅ២១ បានរួមមានម្សៅក្រាមពណ៌សថ្លា សង្ស័យជាសារធាតុញៀនចំនួន ០១កញ្ចប់ធំ ម៉ូតូ ០១គ្រឿង ទូរស័ព្ទដៃ ០២គ្រឿង កាំភ្លើងកែច្នៃ ០១ សម្ភារៈប្រើប្រាស់សម្រាប់ជក់ និងថង់ច្រកថ្នាំមួយចំនួន ភ្លាមនោះសមត្ថកិច្ចយើងក៏បានឃាត់ខ្លួនជនសង្ស័យ រួមនឹងវត្ថតាងដើម្បីកសាងសំណុំរឿងតាមនីតិវិធី៕
