ខេត្តកំពង់ស្ពឺ៖ ល្ងាចថ្ងៃទី២០ ខែឆ្នូ ឆ្នាំ២០២៤ នៅចំណុចលើផ្លូវជាតិលេខ៤៤ (៣៧-៣៨) ស្ថិតនៅក្នុងភូមិមនោរម្យ ឃុំហោងសំណំ ស្រុកឱរ៉ាល់ ខេត្តកំពង់ស្ពឺ មានករណីគ្រោះថ្នាក់ចរាចរណ៍រវាងរថយន្ត និងរថយន្ដ ក្នុងនោះរថយន្តដឹកកម្មករទៅបេះផ្លែស្វាយ បានប៉ះជាមួយរថយន្តដឹកគ្រឿងសង្ហារិមដឹកគ្រែតុទូឈើដើរលក់ បណ្ដាលឱ្យគ្រោះថ្នាក់ក្រឡាប់រថយន្តដឹកកម្មករបេះផ្លែស្វាយ ធ្លាក់ចេញពីផ្លូវជាតិលេខ៤៤ និងបណ្ដាលឱ្យរងរបួសមនុស្សជាច្រើននាក់ រហូតមានអ្នកស្លាប់បាត់បង់ជីវិតម្នាក់ផងដែរ ។
ហេតុការណ៍ខាងលើនេះ សមត្ថកិច្ចនគរបាលចរាចរណ៍ នៃអធិការដ្ឋាននគរបាលស្រុកឱរ៉ាល់ បានចុះអន្ដរាគមន៍ជួយសម្រួលនីតិវិធី និងសង្រ្គោះអ្នករបួសបញ្ជូនទៅមន្ទីរពេទ្យ រីឯអ្នកស្លាប់បានតំកល់ទុកជូនសាច់ញាតិមកទទួលយកទៅធ្វើបុណ្យតាមប្រពៃណីសាសនា ។
ករណីគ្រោះថ្នាក់ខាងលើនេះ តាមមន្រ្ដីនគរបាលចរាចរណ៍ចុះផ្ទាល់ថា រថយន្ត ១គ្រឿង ម៉ាក HYUNDAI MIGHTY ពណ៌ស ពាក់ផ្លាកលេខភ្នំពេញ 3F-5022 អ្នកបើកបរមិនស្គាល់អត្តសញ្ញាណ រត់គេចខ្លួន ក្រោយជួបគ្រោះថ្នាក់ ដោយមានអ្នករួមដំណើរប្រមាណ ១០ នាក់ អ្នករងរបួស រួមមាន៖
*១-ឈ្មោះ វីង ធីដាវ ភេទប្រុស អាយុ ៥២ឆ្នាំ ជនជាតិវៀតណាម (បាក់ជើងខាងស្ដាំ) ឃុំថ្មគ ស្រុកល្វាឯម ខេត្តកណ្ដាល
*២-ឈ្មោះ ទុំ ចិន្ថា ភេទប្រុស អាយុ ៤៩ឆ្នាំ (របួសស្រាល) ឃុំព្រែកតាស ស្រុកពោធិរៀង ខេត្តព្រៃវែង
*៣-ឈ្មោះ ពុធ សំណាង ភេទប្រុស អាយុ ១៨ឆ្នាំ
*៤-ឈ្មោះ ជា ហេង ភេទប្រុស អាយុ ៦៣ឆ្នាំ (របួសស្រាល)
*៥-ឈ្មោះ ឆាយ សយ ភេទប្រុស អាយុ ៥២ឆ្នាំ (របួសស្រាល)
*៦-ឈ្មោះ ពុំ ពឿន ភេទប្រុស អាយុ ៤៤ឆ្នាំ (របួសស្រាល)
*៧-ឈ្មោះ សុន ផល្លា ភេទប្រុស អាយុ ៣២ឆ្នាំ (របួសស្រាល)
*៨-ឈ្មោះ ទុំ ដានី ភេទប្រុស អាយុ ២០ឆ្នាំ (របួសស្រាល)
*៩-ឈ្មោះ គង់ សារ៉ុង ភេទប្រុស អាយុ ២៤ឆ្នាំ (របួសស្រាល)
*១០-ឈ្មោះ សែង ដានុន ភេទប្រុស អាយុ ១៩ឆ្នាំ (របួសស្រាល) ។
តាមសាក្សីដែលឋិតក្នុងហេតុការណ៍ បញ្ជាក់ថា រថយន្តបើកបរក្នុងទិសដៅពីកើតទៅលិច បើកបរបញ្រ្ចាសទិសគ្នា លុះមកដល់ចំណុចកើតហេតុខាងលើ រថយន្តបែក កង់ រួចជ្រុលទៅបុករថយន្ត ១គ្រឿង ម៉ាក HYUNDAI ពណ៌ខៀវ ពាក់ផ្លាកលេខ កំពង់ស្ពឺ 2A-4502 ទើបក្រឡាប់តែម្ដង បណ្ដាលឲ្យ ឈ្មោះ វ៉ន ឆេន ភេទប្រុស អាយុ ៤៨ឆ្នាំ អ្នកបើកបរ (របួសស្រាល) អ្នករួមដំណើរម្នាក់ឈ្មោះ ម៉ក់ ដា ភេទស្រី អាយុ ៣៨ឆ្នាំ (ស្លាប់ភ្លាមៗនៅកន្លែងកើតហេតុ ជាប្រពន្ធអ្នកបើកបរ) រស់នៅភូមិព្រៃផ្តៅ ឃុំព្រៃក្រសាំង ស្រុកសាមគ្គីមុនីជ័យ ខេត្តកំពង់ស្ពឺ (ស្រុកបំបែកពីស្រុកឧដុង្គ) ។
បច្ចុប្បន្នគរបាល បានស្ទួចយករថយន្ដខាងលើមករក្សាទុកនៅអធិការដ្ឋាននគរបាលស្រុកឱរ៉ាល់ ដើម្បីបន្ដនីតិវិធីកសាងសំណុំរឿងបញ្ជូនទៅការិយាល័យចរាចរណ៍ផ្លូវគោកបន្ដ ៕ 
