ភ្នំពេញ៖ ចៅក្រមសើ បសួរ នៃសាលាដំបូងរាជធានីភ្នំពេញ នៅថ្ងៃទី៣១ ខែតុលា ឆ្នាំ២០២៤នេះ បានសម្រេចដោះលែងបុរសម្នាក់ចេញពីពន្ធនាគារ ក្រោយចាប់ និងឃុំខ្លួន បន្ទាប់ពីរងបណ្ដឹងពីស្ដ្រីម្នាក់ពាក់ព័ន្ធករណីចាប់ឆ្កែចិញ្ចឹម១ក្បាល។ សំណុំរឿងមួយនេះ ទាំងស្ថាប័ននគរបាល និងតុលាការ ក៏ត្រូវបានមហាជនយកធ្វើ ជាប្រធានបទជជែកគ្នាពេញបណ្ដាញសង្គមផងដែររ។ យ៉ាងណាក៏ដោយទាំងស្ថាប័នតុលាការនិងនគរបាលមិនទាន់បានឃើញចេញសេចក្តីប្រកាសព័ត៌មានឆ្លើយតបចំពោះបញ្ហានេះនៅឡើយ។
គួរបញ្ជាក់ថា ដើមចមនៃបណ្ដឹង រហូតឈានដល់ការចាប់ និងឃុំខ្លួនបុរសខាងលើនេះ ត្រូវបានគេបញ្ជាក់ថា បុរសខាងលើ និងដើមបណ្ដឹងជាមនុស្សស្គាល់គ្នា ពោលចុងចម្លើយជាកូនចៅធ្វើការងារជាកម្មករឲ្យដើមបណ្ដឹង ដែលគេដឹងថាមានប្ដីជាជនជាតិចិន។
រឿងរ៉ាវដែលត្រូវគេចែកចាយតាមបណ្ដាញសង្គមនេះ បានឲ្យដឹងថា ស្ដ្រីដើមបណ្ដឹងមិនបានបើកលុយថ្លៃធ្វើការដោយកម្លាំងពលកម្មជាអ្នកបើកបររថយន្ដ ចំនួន៦០ ម៉ឺនរៀល ឲ្យបុរសចុងចម្លើយនោះទេ ដោយសន្យាថ្ងៃនេះថ្ងៃនោះជាបន្ដបន្ទាប់។ ដោយសារចិត្តខឹង បុរសជាចុងចម្លើយបានចាប់កូនឆ្កែចិញ្ចឹម១ក្បាលរបស់ស្ដ្រីដើមបណ្ដឹង រួចយកទៅស្រុកកំណើតនៅខេត្តក្រចេះ។
ពេលនោះភាគីទាំងពីរបានឈ្លោះទាស់ ទែងគ្នា ហើយស្ដ្រីដើមបណ្ដឹង បានដាក់នពាក្យប្ដឹងទៅនគរបាលខណ្ឌសែនសុខ រហូតត្រូវបានតុលាការចេញដីកាបង្គាប់ឲ្យចាប់ខ្លួនបុរសខាងលើឈ្មោះ ណន សុខហេង។ កាលដែលចាប់ខ្លួននោះ ធ្វើឡើងនៅថ្ងៃទី១៥ ខែតុលា ឆ្នាំ២០២៤ នៅខេត្តក្រចេះ រួចបញ្ជូនមករាជធានីភ្នំពេញ។
រំលងបានប៉ុន្មានថ្ងៃ ក្រោយទទួលព័ត៌មានថា បុរសខាងលើត្រូវបានតុលាការរាជធានីភ្នំពេញ សម្រេចឃុំខ្លួននោះ ហើយរឿងរ៉ាវនេះបានផ្ទុះការវែកញែកគ្នានៅតាមបណ្ដាញសង្គមតែម្ដង។ រហូតនៅថ្ងៃទី៣១ ខែតុលា ឆ្នាំ២០២៤នេះ ចៅក្រមស៉ើបសួរ ទិត ដាលីន បានចេញដីកាបង្គាប់ឲ្យដោះលែងបុរសខាងលើវិញ៕
