ភ្នំពេញ៖ ផ្ទះ១កន្លែងមានទីតាំងស្ថិតនៅក្នុងភូមិអករំដួល សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ខណៈម្ចាស់អត់នៅ ហើយចាក់សោទ្វារចោល ក៏ស្រាប់តែមានចោរ១ក្រុម ធ្វើសកម្មភាពគាស់លួចយកម៉ូតូចំនួន៣គ្រឿង កាលពីវេលាម៉ោង៣ និង៥នាទីទៀបភ្លឺថ្ងៃទី៤ ខែកញ្ញា ឆ្នាំ២០២៤ ។ ខណៈននោះអ្នកភូមិឃើញហើយស្រែកថាចោរៗបង្កការភ្ញាក់ផ្អើល ហើយចោរក៏យកម៉ូតូ២គ្រឿងទៅបាត់អស់ ចំណែក១គ្រឿងទៀតអត់ឆេះហើយបែកកង់ទៀត យកតៅមិនរួចចោរក៏រុញទម្លាក់ចូលទៅក្នុងមាត់លូទឹកតែម្ដង ។
ម្ចាស់ផ្ទះឈ្មោះម៉ា នីកា ភេទស្រី អាយុ២៩ឆ្នាំ មុខរបរលក់អីវាន់អនឡាញ បាត់បង់ម៉ូតូម៉ាក Honda Zoomer-X ចំនួន២គ្រឿងក្នុងនោះ ១គ្រឿងពណ៌ក្រហម ស ពាក់ស្លាកលេខកណ្ដាល1AA-4799 និង១គ្រឿងមិនចាំស្លាកលេខ ។ ចំណែកឯម៉ូតូ១គ្រឿងទៀតដែលចោររុញទម្លាក់ចូលមាត់លូទឹកនោះម៉ាកHonda Scoopy ពណ៍ស ពាក់ស្លាកលេខភ្នំពេញ1FE-2401 ។
ម្ចាស់ផ្ទះបាននិយាយថា តាមរយៈការឆែកកាមេរ៉ាសុវត្ថិភាពបានឃើញថា ក្រុមចោរមានគ្នាចំនួន៤នាក់ ហើយបានគាស់និងដោះកញ្ចក់ទ្វារផ្ទះរួចចូលលួចយកម៉ូតូចំនួន៣ គ្រឿងដែលគាត់ទុកនៅនៅក្នុងផ្ទះនោះ ។
ម្ចាស់ផ្ទះបាននិយាយបន្តទៀតថា នៅវេលាល្ងាចថ្ងៃទី៣ ខែកញ្ញា គាត់បានចាក់សោទ្វារផ្ទះដោយអត់មានអ្នកនៅមើលទេ ហើយក៏ជិះរថយន្តទៅលេងផ្ទះបងថ្លៃ នៅឯក្រុងតាខ្មៅ ខេត្តកណ្ដាល ហើយអត់បានត្រលប់មកវិញនោះទេ ដោយដេកនៅផ្ទះបងថ្លៃនោះ១យប់ ។ លុះដល់វេលាម៉ោងជាង៣ទៀបភ្លឺថ្ងៃទី៤ ខែកញ្ញា ស្រាប់តែអ្នកជិតខាងបានទូរសព្ទប្រាប់ថា មានចោរគាស់ផ្ទះ និងបានឃើញចោរកំពុងអូសម៉ូតូចេញពីផ្ទះរបស់គាត់ ។
ម្ចាស់ផ្ទះបាននិយាយទៀតថា ពេលនោះគាត់បានបើករថយន្តត្រលប់មកផ្ទះវិញភ្លាមៗ ហើយពេលមកដល់ឃើញទ្វារចំហរនិងបាត់ម៉ូតូទាំង៣គ្រឿង ទើបទៅប្ដឹងនគរបាលប៉ុស្តិ៍សំរោងក្រោមឲ្យជួយអន្តរាគមន៍ ។ រហូតដល់ព្រឹកឡើងស្រាប់តែមានគេទៅប្រាប់ថា បានប្រទះឃើញម៉ូតូHonda Scoopy ១គ្រឿងនៅក្នុងប្រឡាយទឹកចំងាយ១០០ម៉ែត្រពីផ្ទះ ។ ភ្លាមនោះគាត់ទៅមើលហើយបានស្គាល់ថាជាម៉ូតូរបស់គាតដែលចោរទុកចោល ក៏ស្រង់យកទៅធ្វើការជួសជុលដើម្បីទុកជិះបន្តទៀត ។
ប្រជាពលរដ្ឋបាននិយាយថា នៅពេលដែលជនសង្ស័យកំពុងអូសម៉ូតូចេញទៅនោះពួកគាត់បានស្រែកថាចោរៗ បង្កឲ្យមានការភ្ញាក់ផ្អើល ទើបចោរយកម៉ូតូទៅបានតែ ២គ្រឿង ហើយរុញទម្លាក់ចោលទៅក្នុងប្រឡាយទឹក១គ្រឿងបែបនេះ តែម្ដង ៕ 
