បើកវ៉ាជែងខ្វះការប្រុងប្រយ័ត្នជ្រុលទៅបុកគោយន្តកន្រ្តៃអោយស្លាប់និងរបួស

(ខេត្តបាត់ដំបង)៖ យ៉ាងហោច ណាស់បុរសម្នាក់បានបាត់បង់ជីវិតភ្លាមៗនិងម្នាក់ទៀតរងរបួសធ្ងន់ ក្រោយបើកម៉ូតូវ៉ាជែង ខ្វះការប្រុងប្រយ័ត្នបានជ្រុលទៅបុកជាមួយគោយន្តកន្រ្តៃនៅវេលាម៉ោង១៩និង៣០នាទីយប់ ថ្ងៃទី២៤ ខែវិច្ឆិកា ឆ្នាំ២០២៤ លើកំណាត់ផ្លូវក្រាលគ្រួសក្រហមពីអក្សរតេ មកឃុំចែងមានជ័យ ត្រង់ចំណុចពីខាងត្បូងស្ពានមេម៉ាយ ស្ថិតក្នុងក្រុមទី៦ ភូមិបុះខ្នុរ ឃុំចែងមានជ័យ  ស្រុកបាណន់  ខេត្តបាត់ដំបង ។

ប្រភពពីពលរដ្ឋនៅកន្លែងកើតហេតុបានប្រាប់ឲ្យដឹងដឹងថា ករណីគ្រោះថ្នាក់ចរាចរណ៍ខាងលើនេះបានកើតឡើងរវាងម៉ូតូម៉ាកហុងដាឌ្រីម ពណ៌ខ្មៅ សេរីឆ្នាំ២០១៩មួយគ្រឿង ពាក់ស្លាកលេខ បាត់ដំបង1AH -4316 បើកបរដោយឈ្មោះ វ៉ាត់ ជីវី ភេទប្រុស អាយុ២៤ឆ្នាំ រស់នៅភូមិសំបួរមាស ឃុំស្នឹង ស្រុកបាណន់ ខេត្តបាត់ដំបង (ស្លាប់នៅនឹងកន្លែងកើតហេតុ) និងអ្នករួមដំណើរ ១នាក់ ឈ្មោះ ធុយ សុធាន ភេទប្រុស អាយុ២៦ឆ្នាំ រស់នៅភូមិធ្ងរ ឃុំចែងមានជ័យ  ស្រុកបាណន់ ( រងរបួសធ្ងន់) បើកបរទិសដៅពីត្បូងទៅជើង លុះមកដល់ចំណុចកើតហេតុបានឡើងវ៉ាជែងក៏ជ្រុលទៅបុកគោយន្តកន្ត្រៃសណ្តោងរ៉ឺម៉ក បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ ទិសដៅពីជើងទៅត្បូង ។

ក្រោយពេលកើតហេតុជនរងគ្រោះត្រូវបានបញ្ជូនទៅមន្ទីរពេទ្យខេត្តបាត់ដំបង ចំណែកសាកសពប្រគល់អោយសាច់ញាតិយករៀបចំធ្វើបុណ្យតាមប្រពៃណី ដោយឡែកមធ្យោបាយទាំងពីរយកទៅរក្សាទុកនៅការិយាល័យចរាចរណ៍ខេត្តដើម្បីចាត់ការតាមនិតិវិធីច្បាប់ ៕