ខេត្តព្រះវិហារ៖ សេចក្តីរាយការណ៍ឲ្យដឹងថា បុរសម្នាក់បានជិះម៉ូតូធ្លាក់ជង្ហុករួចដួលបាក់ភ្លៅទាំង២ រហូតឈានដល់ស្លាប់។ ហេតុការណ៍នេះបានកើតឡើងនៅវេលាម៉ោង២០ និង ៣០នាទីថ្ងៃទី២៦ខែកញ្ញាឆ្នាំ២០២៤ នៅផ្លូវជាតិលេខ៦២ចន្លោះគីឡូលេខ៤៤/៤៥ស្តិតនៅភូមិអូរពោធិ៍ ឃុំរមណីយ ស្រុករវៀង ខេត្តព្រះវិហារ ។
សមត្ថកិច្ចបានឲ្យដឹងថា ជនរងគ្រោះឈ្មោះអូត រិត ភេទ ប្រុស អាយុ៣០ឆ្នាំរស់នៅភូមិទូលគ្រើល ឃុំទួលគ្រើល ស្រុកប្រាសាទបល្លង្គ័ ខេត្តកំពង់ធំ បានជិះម៉ូតូម៉ាកវេវពណ៌ខ្មៅ(គ្មានស្លាកលេខ)បានធ្លាក់ជង្ហុកធំមួយនៅលើផ្លូវជាតិលេខ៦២ បណ្តាលឲ្យរងរបួសធ្ងន់ រហូតឈានដល់ស្លាប់នៅនឹងកន្លែងតែម្តង។
បន្ទាប់ពីសមត្ថកិច្ចធ្វើកោសល្យវិច័យ និងវាស់វែងរួចក៏ បានប្រគល់សាកសព ឲ្យក្រុមគ្រួសារយកទៅធ្វើបុណ្យតាមប្រពៃណី។ រីឯសម្ភារៈវត្ថុតាងក្រុមគ្រួសារបានសុំយកទៅប្រើប្រាស់។
សមត្ថកិច្ចសំណូមពរឲ្យអ្នកធ្វើដំណើរតាមផ្លូវជាតិលេខ ៦២ មេត្តាបង្កើនការប្រុងប្រយ័ត្ន ព្រោះផ្លូវបានរងការខូច ខាតជាច្រើនកន្លែងដោយសារកត្តា ជំនន់ទឹកភ្លៀង៕ 
