នារសៀលថ្ងៃទី១៩ខែកញ្ញាឆ្នាំ២០២៤នេះ ឯកឧត្តមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានអញ្ជើញជាអធិបតីភាពប្រកាសលទ្ធផលជ័យលាភីគ្រូមត្តេយ្យសិក្សា ក្របខណ្ឌក្រសួងអប់រំ យុវជន និងកីឡា ដែលបានប្រឡងជាប់ជាស្ថាពរ
ក្រោយពីបានដំណើការប្រឡងប្រជែងចំនួន២លើករួចមក នៅសាលាភូមិន្ទរដ្ឋបាល ដោយមានការចូលរួមពីថ្នាក់ដឹកនាំក្រសួងអប់រំយុវជននិងកីឡា ,ថ្នាក់ដឹកនាំ គណៈកម្មការប្រឡង ,មន្ត្រីអង្គភាពប្រឆាំងអំពើពុករលួយ និងអ្នកស្ម័គ្រចិត្តចូលរួមសង្កេតការណ៍។
ការប្រឡងប្រជែងជ្រើសរើសគ្រូបង្រៀនមត្តេយ្យសិក្សាយ៉ាងម៉ត់ចត់បំផុត ក្រោមការរៀបចំដោយក្រសួងមុខងារសាធារណៈ អស់រយៈពេលជាច្រើនថ្ងៃកន្លងមកនេះ បេក្ខជនជ័យលាភីប្រឡងជាប់ស្ថាពរទាំង ២០០នាក់ ក្នុងនោះស្រី១៥២នាក់ គឺបានសម្រាំងចេញក្នុងចំណោមបេក្ខជនជាង១ម៉ឺននាក់។
ជ័យលាភីគ្រូបង្រៀនមត្តេយ្យសិក្សា នឹងត្រូវចូលបម្រើការងារក្នុងក្របខណ្ឌក្រសួងអប់រំ យុវជន និងកីឡាក្រោយពេលបណ្តុះបណ្តាលនៅសាលាគរុកោសល្យចប់ ។
សូមបញ្ជាក់ថា គិតមកដល់ពេលនេះ ក្រសួងមុខងារសាធារណៈ បានជ្រើសរើសមន្ត្រីក្របខណ្ឌក្រសួងអប់រំ យុវជន និងកីឡា ដោយប្រឡងចំនួន ៤ដង រួមមាន ក្របខណ្ឌគ្រូកីឡា , គ្រូបង្រៀនអនុវិទ្យាល័យ, គ្រូបង្រៀនបឋមសិក្សា និងគ្រូបង្រៀនមត្តេយ្យសិក្សា ដែលជ្រើសរើសបានបេក្ខជនសរុបចំនួន ២០៨៨នាក់ ៕
